I heile området er der godt merka stiar, med gode turkart tilgjengeleg og stor variasjon i rutene – frå koselege rusleturar til tøffe toppturar. Eller kanskje frå hytte til hytte i Tafjordfjella for dei som vil ha lengre turar. Overalt kjem du tett på naturen og får opplevingar du aldri vil gløyme!

Her er 6 forslag til uforgløymelege turar:

1. Skageflå - med båt frå Geiranger ut til Skagehola, gå 250 høgdemeter opp til garden. Strålande utsikt over Geirangerfjorden og Dei Sju Systre. Retur til fots ca 3 timar - eller bli henta av båten. Dette må opplevast!
2. Den Trondhjemske Postveg - frå Hellesylt/Ljøen til Strandadalen, langs historisk grunn og med fantastisk utstikt over Sunnylvsfjorden, innløpet til Geirangerfjorden og Sunnmørsalpane.
3. Storsæterfossen i Geiranger - ca ein halv times gange frå Westerås gard. Du kan gå bak fossen og sjå vatnet tordne ned framføre deg - ei vill oppleving!
4. Kilstivatnet i Eidsdal - vandring langs stiar, rundt det idylliske vatnet og til den gamle sætra ved enden av det. Avstikkarar til fjelltoppar i området er muleg, frå lave til veldig høge.
5. Laushornet i Geiranger - tøff tur som tar deg til spektakulær utsikt over verdsarvområdet.
6. Frå hytte til hytte i Tafjordfjella, der Turistforeninga har lagt alt til rette for turglade i alle aldrar.

God tur!